Fyrr í dag hevur verið lutakast til fyrsta umfar í EHF Cup, sum er altjóða evropeisk hondbóltskapping. Neistakvinnur, sum í farna kappingarári vunnu føroyameistaraheitið fyri 41. ferð, skulu spæla ímóti rumenska CSM Ploiesti.
Tað er ikki á hvørjum ári, at føroysk feløg taka lut í hesi kapping, men lukkutíð fyri føroyskan hondbólt hevur Neistin valt at taka av møguleikanum í ár. Tað gjørdi grøna grannafelagið, Kyndil, eisini í 2014, tá ið belgiska Femina Vise vitjaði í Føroyum. Tá tapti Kyndil tilsamans við seks málum yvir tveir dystir.
Mótstøðuliðið hjá Neistanum endaði nummar seks í bestu rumensku deildini í farna kappingarári.
Báðir dystirnir ímóti CSM Ploiesti verða spældir í september. Fyrri dysturin verður spældur 10. ella 11. september, meðan seinni dysturin verður spældur 17. ella 18. september.
Neistin skrivar á heimasíðu síni, at ætlanin er, at annar dysturin skal spælast á heimavøllinum í høllini á Hálsi. Hetta er ikki nøkur sjálvfylgja.
Evropeisku avbjóðingarnar verða somuleiðis fyrstu dystirnir hjá nýggja brasilska venjaranum hjá neistakvinnum, Danilo Gagliardi.
