Russland hevur handað USA ein lista við krøvum um friðaravtalu við Ukraina.
Tað siga tvær ónevndar keldur við vitan um málið, sambært tíðindastovuni Reuters.
Tað er ikki greitt, hvat stendur á listanum ella um Russland fer at luttaka í samráðingum við Ukraina, fyrr enn krøvini eru samtykt, skrivar Reuters.
Sambært keldunum hava russisk og amerikansk embætisfólk umrøtt listan bæði á fysiskum og virtuellum fundum seinastu tríggjar vikurnar.
Keldurnar lýsa krøvini sum "almenn". Tey skulu eisini vera í samsvari við krøv, sum Russland áður hevur sett Ukraina, USA og NATO.
Undanfarin krøv hava millum annað verið, at Ukraina ikki skal gerast limur í NATO, og at avtala skal gerast um ikki at senda útlendskar herdeildir til Ukraina.
Russland hevur eisini áður kravt altjóða viðurkenning av pástandinum hjá Vladimir Putin, forseta, um at Krim-hálvoyggin, sum Russland tók undir seg í 2014, og fýra aðrir landslutir hoyra til Russland.
Mikukvøldið boðaði talskvinnan í Hvítu Húsunum, Karoline Leavitt, frá, at Steve Witkoff, serligi sendiharrin hjá USA í Miðeystri, fer í vikuni til Moskva í Russlandi at tosa um møguleikarnar fyri vápnahvíld við Ukraina.
Stutt undan fráboðanini hevði amerikanski forsetin, Donald Trump, lagt dent á, at amerikanskir samráðingarmenn vóru á veg til vápnahvíldarfundir í Moskva.
Sambært amerikanska uttanríkisráðharranum, Marco Rubio, er bólturin "nú á russiska vøllinum".
USA og Ukraina hava lagt fram eina felags yvirlýsing, har sagt verður, at Ukraina stuðlar einum amerikanskum uppskoti um vápnahvíld í krígnum við Russland í 30 dagar beinanvegin.
Hvørki russiska sendistovan ella Hvítu Húsini hava svarað fyrispurningum frá Reuters um fráboðanir um ein lista við krøvum frá Russlandi.
/Ritzau/
