Sørvingar bestir á vestanstevnu

Bygdirnar í Vágum skiftast um at vera vertir fyri vestanstevnu. Í dag er Miðvágur vertur, og tað var ein av bátunum í Vágum, sum vann, tá ið dreingirnir í barnaróðrinum kappaðust.

Sørvágsdreingir umborð á Dúgvuni vunnu, og sigurin var avgjørt ikki óvæntaður. Dúgvan hevur vunnið allar tær fimm undanfarnu ferðirnar, og aftur í dag var Dúgvan best.

Í Hósvík eru dreingirnir óførir í kappróðri. Tað sæst á úrslitunum bæði í barnaróðrinum og í kappingini millum 5-mannafør við dreingjum.

Sum tær undanfarnu fimm ferðirnar endaði Falkur aftur í dag næstfremst, og tað var spenningur um sigurin. Dúgvan var eina hálva bátslongd ella stívliga tað undan Falki. Tað vóru bara hesir báðir bátarnir, sum kappaðust um sigurin.

Í kappingini um triðja plássið vann Tistil hjá Froðbiar Sóknar Róðrarfelag greitt á Sævarmoy úr Klaksvík, og nú stendur tað á jøvnum millum hesar báðar bátarnar í kappingini um bronsukrónurnar í FM.

Tað er longu greitt, at Dúgvan er FM vinnari, og at Falkur hevur vunnið silvurkrónurnar.