Bæði føroyingaliðini í bestu svensku hondbóltsdeildini spældu í dag fyrru áttandapartsfinalurnar í svensku steypakappingini.
Óli Mittún og liðfelagarnir í Sävehof ferðaðust í dag suður til Malmö fyri at spæla dyst móti HK Malmö.
Sävehof vann stórsigur 30-19. Í steðginum var Sävehof á odda heili 18-6, og tí kundu teir taka sær meira av løttum í seinna hálvleiki.
Óli gjørdist saman við Felix Møller og Sebastian Spante toppskjútti hjá Sävehof. Teir tríggir skutu fimm mál hvør.
Seinna áttandapartsfinalan verður spæld í Partille komandi mikukvøld klokkan 18.
Verri gekst í hond hjá Róa Ellefsen á Skipagøtu og liðfeløgunum í Hallby.
Hallby tapti í fyrru áttandapartsfinaluni á heimavølli 29-36 fyri Önnered. Önnered var á odda 20-14 í steðginum.
Rói skoraði tvey mál í dystinum.
Tað sær sostatt svart út hjá Hallby at vinna seg víðari í steypakappingini.
Seinna áttandapartsfinalan verður leikt í Göteborg komandi mikukvøld klokkan 18.
