Mohamed Salah bleiv í kvøld fyrsti spælarin í Premier League, at skora hattrik á Old Trafford móti Manchester United. Liverpool vann ein knúsandi 5-0 sigur, ið kann fáa avleiðingar fyri venjaran hjá Manchester United, Ole Gunnar Solskjær.
Tað hava verið krepputekin í Manchester United í hesum kappingarárinum, men hvørja ferð hevur Cristiano Ronaldo bjargað teimum. Soleiðis bleiv ikki í dag, tá Liverpool var á vitjan á Old Trafford.
Gestirnir hava minst trý mál í fleiri av útidystunum í hesum kappingarárinum. Tað høvdu teir longu gjørt eftir 38 minuttir móti Manchester United. Naby Keita, Diogo Jota og Mohamed Salah skoraðu fyrstu málini.
Beint fyri hálvleik økti sami Mohamed Salah til 4-0. Í seinna hálvleiki setti hann punktum við hattriki til 5-0. Cristiano Ronaldo helt, at hann hevði minkað um munin, men málið bleiv kolldømt fyri rangstøðu, eftir eitt VAR-tjekk.
Manchester United fekk eisini Paul Pogba útvístan, eftir at hann sendi Naby Keita heim á eini børu við eini ógvusligari takling. Spælararnir hjá Liverpool vildu eisini, at Cristiano Ronaldo skuldi hava ostaskorpuna, tá hann eftir at dómarin hevði bríkslað fyri frísparki, sparkaði bóltin í búkin á Curtis Jones. Tað endaði við gulum korti.
Hetta er fystu ferð, at ein spælari skorar hattrik á Old Trafford móti Manchester United í Premier League. Hetta tangerar størstu tapini hjá Manchester United á heimavølli í Premier League. Fyri tíggju árum síðani vann Manchester City 6-1, og tað gjørdi Tottenham eisini í farna kappingarári.
1 | Chelsea | 9 | 7 | 1 | 1 | 23:3 | 22 |
2 | Liverpool | 9 | 6 | 3 | 0 | 27:6 | 21 |
3 | Manchester City | 9 | 6 | 2 | 1 | 20:4 | 20 |
4 | West Ham | 9 | 5 | 2 | 2 | 16:10 | 17 |
5 | Brighton | 9 | 4 | 3 | 2 | 9:9 | 15 |
6 | Tottenham | 9 | 5 | 0 | 4 | 9:13 | 15 |
7 |
Manchester United | 9 | 4 | 2 | 3 | 16:15 | 14 |
8 | Everton | 9 | 4 | 2 | 3 | 15:14 | 14 |
9 | Leicester | 9 | 4 | 2 | 3 | 15:15 | 14 |
10 | Arsenal | 9 | 4 | 2 | 3 | 10:13 | 14 |
11 | Wolves | 9 | 4 | 1 | 4 | 9:9 | 13 |
12 | Brentford | 9 | 3 | 3 | 3 | 11:9 | 12 |
13 | Aston Villa | 9 | 3 | 1 | 5 | 13:15 | 10 |
14 | Watford | 9 | 3 | 1 | 5 | 12:17 | 10 |
15 | Crystal Palace | 9 | 1 | 6 | 2 | 11:14 | 9 |
16 | Southampton | 9 | 1 | 5 | 3 | 8:12 | 8 |
17 | Leeds | 9 | 1 | 4 | 4 | 8:16 | 7 |
18 | Burnley | 9 | 0 | 4 | 5 | 7:15 | 4 |
19 | Newcastle | 9 | 0 | 4 | 5 | 11:20 | 4 |
20 | Norwich City | 9 | 0 | 2 | 7 | 2:23 | 2 |