– Skatturin skal vera 20 prosent, og so skal restin fíggjast við brúkaragjøldum, segði hann so bersøgin undir viðgerðini av løgmansrøðuni.
Lømaður nam sjálvur við málið í røðu síni á ólavsøku. Hann segði, at landsstýrið arbeiðir við at finna fram til, hvussu tað ber til at lækka skattatrýstið á arbeiðsinntøku í Føroyum.
– Tað er gleðiligt, at vit ætla at lækka skattin uppaftur meira. Vit hava jú sæð skattatrýst upp ímóti 60 prosentum. Tað hevði tí verið ynskiligt, at vit lækkaðu skattaprosentið niður á 20 prosent, segði Hanus Samró – og hann helt fram:
– 10 prosent í landsskatti og 10 prosent í kommunuskatti! That's it! – og so verður restin fíggjað við brúkaragjøldum, segði Hanus Samró.
– Og ongantíð betur – ongantíð betur, legði hann dent á – enn at vit gera okkara sokallaða flatskatt uppaftur flatari. Tað hevði verið tað besta, sum kundi hent – at vit lækka hann úr 40 prosentum niður á 20 prosent – og so eru vit kvitt, sigur Hanus Samró, løgtingsmaður.
Hóast onkur vil halda, at Hanus tosar úr egnum brósti, so er Jørgen Niclasen ikki ósamdur við honum.
Við in.fo segði hann, at hann eisini ynskti sær 20 prosent skattaloft.
– Vit hava hægsta inntøkuskattin í heiminum, so vit mugu fáa skattin niður. Og tað eru tey flestu samd um, sigur Jørgen Niclasen, sum tó viðmerkti, at tað ikki verður gjørt eftir einari nátt.
So vita vit, hvat samgongan ætlar – og hvat endamálið er. Eftir er bara hjá Jørgen, ið øllum ræður, at fáa løgmann at siga tað sama.
