Á Sandi verða í løtuni gjørdar fyrireikingar til at fara undir nýggjan barnaskúla.
- Gongur sum ætlað kunnu vit bjóða tann nýggja barnaskúlan út í summar, sigur Páll á Reynatúgvu, borgarstjóri á Sandi.
Arbeitt hevur verið við hesi ætlanini í eini fimm ár, har fólk úr kommununi, skúlastýrinum og lærarar hava tosað saman um krøv, stødd og annað í sambandi við ætlaða skúlan.
Nú er liðugt at tekna uppskotið, og fer sjálv prosjekteringin í gongd í næstum. Um tríggjar mánaðir ella so skal arbeiðið kunna bjóðast út.
- Her verður talan um ein góðan barnaskúla til dagsins standard, sigur borgarstjórin við Sosialin.
Gamli bygdarskúlin hevur nú tænt fyri seg í 123 ár. Í løtuni ganga einir 40 næmingar í 1. til 4. flokki í skúlanum.
Skúlin kemur at standa í bønum omanfyri timburhandilin á Sandi. Hann verður í tveimum hæddum og fer at hava lyftu.
