Semja í Sambandsflokkinum

Ingolf S. Olsen

- Tað verður ov nógv at krevja, at fiskimálaráðharrin skal koma við einum upp­skoti um broytta fiski­vinnu­lóg­­gávu í hesari tingsetuni, tí nú er so langt útliðið, men eg vóni og vænti avgjørt, at hann verður klárur við ein­um uppskoti, tá fari verður undir næstu tingsetu á ólav­søku. Tí hetta hevur skund. Ver­andi loyvi fara úr gildi 1. januar 2018, og vinnan má í góð­ari tíð fáa at vita, hvussu hon skal fyrihalda seg til ta tíð.
Tað sigur Alfred Olsen, fram­søgumaður Sam­bands­flok­sins í fiskivinnumálum og limur í politiska fylgi­bólki­num, sum Jacob Vester­gaard stutt eftir seinasta løg­tingsval setti at styðja seg upp at í arbeiðnum at gera nýggja fiskivinnulóggávu.

Avgerandi evstamark
Alfred Olsen er ósamdur við Jacob Vestergaard, tá hesin heldur, at 1. januar 2018 ikki hevur so stóran týdning, tí loyv­ini sambært lógini tá kunnu endurnýggjast í fimm ár í senn.
- Tað er ikki nóg gott, tí vinnan má kenna sínar for­treytir nógv longur fram í tíð­ina enn so. Ikki minst tá tað ræður um fígging, hevur tað týdn­ing, tí fíggingin verður jú dýrari, størri óvissan er, og tað liggur ein stór óvissa í bara at vita fimm ár fram í tíðina, hvat man hevur at fiska, staðfestir Alfred Olsen.
Fiskimálaráðharrin rør fram undir, at innanhýsis ósemj­ur í samgonguni, eisi­ni innanfloks hjá ávísum sam­gongu­flokkum, eru ein høvuðs­orsøk til, at hann ikki er komin við nøkrum lógar­upp­skoti enn, men Alfred Olsen vísir aftur, at nøk­ur ósem­ja er innanhýsis í Sam­bands­flokkinum.
- Nei vit eru samd, sigur hann avgjørdur.

Avmarkað uppboðssøla
Í sonevndu makrel­sam­gongu­ni, sum virkaði sein­as­tu mánaðarnar av sein­asta valskeiði var Sam­bands­flokkurin við til at leggja lunnar undir fyrstu roynd­ina við uppboðssølu av fiski­rætt­indum í Føroyum.
- Skipanin við upp­boðs­sølu av makrelkvotum í 2011 riggaði fínt, men tað sum riggaði minni væl var, at vit mistu fitt av fiski til útlendsk keyparaskip. Hes­um ber tó til at lóggeva ímóti, og vit ganga inn fyri eini fiskivinnuskipan, sum letur upp fyri uppboðssølu, men avmarkað til bert at um­fata sølu av silda- og makrel­kvotum. Tá tað snýr seg um botnfiskiskapin und­ir Føroyum skulu vit halda okkum til ver­andi loyvis­skip­an við um­seti­lig­um veiði­loyv­um, sigur Alfred Olsen.

Ja til útlendingar
Hann tekur heldur ikki undir við uppskotinum hjá Jacob Vestergaard um at útihýsa út­lendskum eigaraskapi í før­oysk­um fiskiskipum og har­við rættindum.
- Tað hevur týdning, at vit hava atgongd til útlendskan kapi­tal, serliga tá stórar íløg­ur skulu gerast í vinnuni. Tí halda vit fast um, at út­lend­ing­ar framhaldandi skulu sleppa at eiga upp til ein trið­ing, sigur Alfred Olsen.
Hann hedur, at tað ofta verður skapt ein ógrundað ræðu­mynd av útlendskum kapi­tali í vinnuni, og at hon stund­­um verður illtonkt fyri gjøg­num bakdyrnar at loyva størri útlendskum eigara­skapi enn tí triðinginum, sum lógin ásetir sum hægsta­mark.
- Men kanningr vísa, at avmarkingarnar í út­lendsk­um eigaraskapi verða hildnar. At so av­gerðar­rætturin kort­ini í onkrum føri verður av­reidd­ur á út­lend­skar hendur er ein onn­ur søk, sum onnur til­tøk kun­nu setast í verk at byrg­ja upp fyri. Tí vit vita øll av roynd­um, at kapitalur slepp­ur­ ígjøg­num alla staðir, sama um nak­að ella onki mark er fyri útl­endskum eigaraskapi, sigur Alfred Olsen.

Lógin skal dagførast
Hóast nógvir knútar eru og tann størsti, um hvørt fiski­vinnu­skipanin heilt ella bara part­víst skal grundast á eina upp­boðs­søluskipan, tykist vera óloysiligur, so hevur Al­fred Olsen vónir um eina breiða semju. Og fæst hon ikki, so má samgongan sjálv gera neyðugu tillagingarnar.
- Tað er sjálvsagt nógv tað besta, um allir flokkar eru við og kenna eigaraskap av einari nýggj­ari fiskivinnulóggávu, men fyrsta fortreytin er, at samgongan finnur eina sem­ju, og vit skulu fylgja sam­gongu­skjalinum, sum sigur, at vit skulu dagføra fiski­vinnu­lóg­gávuna. So tað má sam­gong­an gera, eisini sjálvt um tað ikki eydnast at fáa øll við, sigur hann.

Fakta
Sonevnda makrelsamgongan var minnilutasamgongan, sum undir leiðslu av Kaj Leo Holm Johannesen, sambandsløgmanni, virkaði frá 6. apríl 2011, tá Fólkaflokkurin fór úr samgonguni, og til valið 29. oktober sama ár. Eftirsitandi samgonguflokkarnir Sambandsflokkurin og Javnaðarflokkurin fóru tá í tætt samstarv við Tjóðveldi og Framsókn um serliga fiskivinnupolitikkin. Hesir flokkar snikkaðu tá saman eina kollveltandi skipan av føroyska makrelfiskiskapinum í 2011, har uppboðssøla av kvotum á fyrsta sinni varð roynd.