Russiski uttanríkisráðharrin, Sergej Lavrov, er komin til New York at taka lut á ST-fundum. Tað upplýsir russiska uttanríkisráðið.
Uttanríkisráðið hevur lagt út eini boð á X, fyrrverandi Twitter við mynd av einum almennum flogfari av slagnum, Iljushin Il-96.
Hetta eru tey flogfør, sum vanliga flúgva við landsins forseta og øðrum stjórnarlimum og tænastufólkum.
Á myndin verður Sergej Lavrov bjóðaður vælkomin.
- Uttanríkisráðharrin, Sergej Lavrov, er komin til New York at luttaka á fundum og tiltøkum, og hann verður eisini við í aðalorðaskiftinum, sigur russiska uttanríkisráðið.
Tíðindastovan NTB vísir á, at ukrainski forsetin, Volodymyr Zelenskyj, fer eisini at halda røðu á einum fundi í ST-trygdarráðnum um Ukraina.
- Væntandi er, at russiski uttanríkisráðharrin eisini verður við á hesum fundi.
Tíðindastovan NTB setir spurnartekin við, um russiski uttanríkisráðharrin fer at vera í salinum, tá ukrainski forsetin fer at halda røðu, og tað er eisini ivasamt, um Volodymyr Zelenskyj verður í salinum, tá Sergej Lavrov heldur røðu.
Sagt verður úr Russlandi, at flogfarið, sum fleyg russiska uttanríkisráðharran til New York, brúkti 11 tímar og 40 minuttir um ferðina.
