HÚSAGANGUR
Enn ein handverksfyritøka hevur nú verið noydd at snara lykilin, samstundis sum alt arbeiðsfólkið er sagt úr starvi.
Teir, sum standa aftanfyri byggifyritøkuna Smíðlist á Rituvíkarhálsi, vórðu herfyri notddir at ásanna, at felagið megnaði ikki sínar skyldur.
Týsmorgunin kallaði Smíðlist alt arbeiðsfólkið til fundar, og tá fingu tey at vita, at felagið er farið á húsagang, og at alt arbeiðsfólkið er sagt úr starvi.
Tað var Eik Banki, sum kravdi felagið á húsagang.
Stórar íløgur
Teir, sum áttu felagið, siga, at íløgurnar hava verið ov stórar í mun til møguleikarnar at tjena pening, soleiðis sum tíðirnar hava verið.
- Vit hava havt fleiri stór arbeiðir, eitt nú útbygging av barnaskúlanum við Gøtugjógv og útbyggingina av Stranda skúla. Í Gøtu er liðugt, og á Strondum eru bara onkrir snøklar eftir, sum onkur annar kemur at gera liðugt.
Tá Smíðlist hevði flest fólk í arbeiði, vóru tey eini 20 í tali, harav 4-5 lærlingar.
Nú uppundir endan vóru tey eini 16-17.
Teir, sum áttu felagið, siga, at virksemið helt uppat fyri góðari viku síðan, og týsdagin varð so fundur, har arbeiðsfólkið varð kunnað um viðurskiftini, og arbeiðsfólkið varð sagt úr starvi.
- Vit hava drigist við stórar íløgur, sum nú gjørdu enda á okkum, siga eigararnir, sum harmast um, at fyritøkan nú er farin á húsagang.
Góðar umstøður
Byggifyritøkan Smíðlist húsaðist í stórum og rúmligum hølum á Rituvíkarhálsi, har pláss var bæði til innan-og uttandura arbeiði. Hølini eru einar 900 fermetrar, og grundøkið rundan um bygningin er einar 2500-3000 fermetrar.
- So, vit høvdu góðar umstøður og gott pláss at arbeiða á, bæði inni og úti.
Eigararnir ásanna, at kappingin á marknaðinum hevur verið hørð, og hóast felagið hevur havt nøkur størri arbeiðir, var hetta ikki nóg mikið til, at fyritøkuni var lív lagað.
