Tað gongur strúkandi hjá Tottenham

Tað gongur strúkandi hjá Tottenham, sum seytjan tær seinastu ferðirnar er farið av vøllinum uttan at tapa. Í dag hevði Spurs á Wimbley vitjan av Huddersfield, sum tvær tær seinastu ferðirnar hevur vunnið úrtøku. Í dag gekk tað ikki hjá Huddersfield, sum er trý stig omanfyri strikuna.

Tottenham vann 2-0. Í báðum førum var tað suðurkoreanski Son Heung-min, sum skoraði – miðskeiðis í fyrra hálvleiki og tíggju minuttir eftir steðgin.

Tottenham er nú á triðja plássi, men Liverpoll hevur møguleika longu í kvøld aftur at taka bronsuplássið.

Hjá Swansea hevur tað gingið væl, síðani portugisiski Carvajal tók ábyrgdina á seg. Tá var liðið aftast og harvið í stórum vanda fyri at flyta niður. Í dag vann Swansea sannførandi 4-1 heimasigur ímóti West Ham. Úrslitið ber við sær, at bæði liðini hava 30 stig og eru trý stig frá niðurflytingarstrikuni.

Bournemouth var leingi á odda í Leicester, men tað eydnaðist heimaliðnum í evstu løtu at javna til 1-1. Úrslitið ber við sær, at fyrrverandi meistaraliðið Leicester er á áttanda plássi. Vónbrotið kendist vera stórt millum gestirnar, sum eru á ellivta plássi og seks stig frá niðurflyting, nú tað resta níggju umfør.

Hjá Wet Bromwich Albion stendur illa til. Liðið er aftast, og í dag endaði tað við 1-0 tapi á útivølli ímóti Watford. Sigursmálið varð skorað trettan minuttir undan leikloki. Síðst í januar varð Javi Gracia settur í venjarasessin hjá Watford. Síðani hevur liðið spælt seks ferður, og úrtøkan hevur verið meiri enn brúkilig – ein javnleikur og sigurin í dag var tann triði.

Watford er nú á níggjunda plássi. Sigurin bar við sær, at liðið lyfti seg framum Everton, sum var á odda á útivølli ímóti Burnley. Heimaliðið svaraði aftur og vann 2-1. Burnley er á sjeynda plássi – fimm stig aftanfyri Arsenal, sum í morgin skal royna seg í Brighton.

Klokkan 17.30 var fyrsta bríksl á Anfield, har Liverpool hevur vitjan av Newcastle.

Stórdysturin í 29. umfari verður í morgin, tá ið toppliðið Manchester City fær vitjan av Chelsea, sum er í aldudali.

Manchester United fær mánakvøldið møguleika á útivølli møguleika at verja næstfremsta plássið á útivølli ímóti Crystal Palace.  

Watford – West Bromwich Albion 1-0

Tottenham – Huddersfield 2-0

Swansea – West Ham 4-1

Southampton – Stoke 0-0

Leicester – Bournemouth 1-1

Burnley – Everton 2-1

Klokkan 17.30

Liverpool – Newcastle

Í morgin

Brighton – Arsenal kl. 13.30

Manchester City – Chelsea kl. 16.00

Mánadagin

Crystal Palace – Manchester United kl. 20.00