Miðað verður eftir, at nevndin, sum skal kanna avleiðingarnar av at flyta Netbankan, og hinar KT skipanirnar hjá bankunum, aftur til Føroya, skal vera liðug í heyst.
Tað sigur Jørgen Niclasen, landsstýrismaður í fíggjarmálum.
Nógv rok stóðst av, tá ið bankarnir gjørdu av at sleppa tí føroyska netbankanum heilt og ístaðin at koyra føroyingar upp í donsku NemID skipanina.
Tað endaði eisini við, at bankarnir sleptu kravinum, og í samstundis varð avtalað ímillum landsstýrið og bankarnar, at ein óheft kanning skal sett í verk at lýsa kostnaðin, fyrimunirnir, og vansarnar við at taka KT skipanum hjá føroysku peningastovnunum aftur til Føroya.
Í hesum sambandi skal kanningin greiða frá, hvørjar avleiðingar tað fær fyri at framtíðartryggja føroyska KT-undirstøðukervið, fyri at menna eina føroyska KT- vinnu og vitanarstøði á økinum, at Netbanking og KT skipanirnar hjá bankunum annars, ikki verða tiknar heimaftur.
Avtalan varð gjørd síðst í mars, og nú vildi Høgni Hoydal, tingmaður fyri Tjóðveldi, hava at vita, hvussu gongst við at seta hesa avtaluna í verk.
Jørgen Niclasen sigur, at í løtuni verður nevndararbeiðið lagt til rættis og í hesum sambandi skal støða takast til, hvør skal manna nevndina, og nær hon skal vera liðug.
Í sambandi við kanningina, hevur løgtingið lagt stóran dent á at tryggja, at talan av álvara er um eina óhefta kanning, og Jørgen Niclasen sigur, at tað er eisini spurningar, sum verður havdur í huga, nú nevndin skal setast.
