Karsten Hansen, landsstýrismaður í heilsumálum, harmast, at hansara úttalilsir á landsfundinum hjá Miðflokkinum næstseinasta vikuskifti hava elvt til kjak á einum málsøki, sum ikki er hansara.
Eftir landsfundin varð hann nevniliga endurgivin fyri at siga, at Bjørn Kalsø, landsstýrismaður í mentamálum, skuldi kanna møguleikarnar fyri at einskilja helvtina av Kringvarpinum. Hetta skuldi semja vera fingin um í landsstýrinum fyri nú tveimum vikum síðani – mánadagin undan landsfundinum.
Ill andstøða
Úttalilsið elvdi beinanvegin til rættiliga øsing í almenna rúminum og millum løgtingslimir.
Í Sosialinum, sum bar tíðindini seinasta mánadag, tóku andstøðu-løgtingskvinnurnar Rigmor Dam úr Javnaðarflokkinum og Gunvør Balle úr Tjóðveldi dýran til.
- Eg havi sagt tað so leingi, at tað er eitt undur, um Kringvarp Føroya yvirlivir hesa samgonguna, segði Rigmor Dam millum annað.
- Eg dugi als ikki at ímynda mær hatta, hatta ljóðar bara so skeivt og so langt úti – fyri ikki at siga forkastiligt, segði Gunvør Balle.
Óli Samró úr Fólkaflokkinum skrivaði í sínum lagi í lesarabrævi, at hann helt, at tað skuldi verða sjálvboðið, um fólk vilja rinda kringvarpsgjald ella ikki.
Bjørn Kalsø segði við útvarpið dagin eftir, at privatiseringstíðindini hjá Karsteni Hansen høvdu staðið í Sosialinum, at hann onki kendi til hesar privatiseringsætlanirnar, men at útveiting av sendingum ætlandi fór at verða ein partur av kringvarpspakkanum, sum hann arbeiðir við. Høvuðsinnihaldið í hesum kringvarpspakkanum er at steðga lýsingunum í Kringvarpinum móti at kringvarpsgjaldið sleppur undan mvg, soleiðis at tann upphæddin í staðin eisini fer í kringvarpskassan.
Mentamálaráðharrin segði, at um úrslitið bleiv, at fleiri sendingar fara at koma uttanífrá, so skuldu tær eisini liva upp til tey krøv og tær reglur, sum eru galdandi fyri eginframleiðsluna hjá Kringvarpi Føroya.
Málið er at fáa eitt fólksligt kringvarp, segði hann við útvarpið, og hann segði eisini, at hann fegin vildi hava andstøðuna við í arbeiðið við tí í hyggju at fáa eina breiða semju.
Stig á rættari leið
Karsten Hansen sigur, at hann ongantíð ætlaði at tekna eina aðra mynd av støðuni enn hana, landsstýrismaðurin aftaná mátti koma við.
- Eg veit ikki akkurát, hvussu eg málbar meg um hatta á landsfundinum, men tað er í øllum førum misskilt, at landsstýrið hevur viðgjørt nakra einskiljing av Kringvarpinum. Vit hava umrøtt møguleikan at lata onnur dugnalig fólk uttanfyri Kringvarpið sleppa fram at at gera sendingar eisini, og tað er so semja um, at landsstýrismaðurin í mentamálum í tí sambandi skal kanna, um tað ber til at útveita upp til 50 prosent av hesum arbeiðnum hjá Kringvarpinum, sigur Karsten Hansen og leggur afturat:
- Tað var hetta eg tosaði um í einum innskotnum setningi í míni røðu, og tað harmist eg um nú. Eg fór út um mark í mun til, hvat eg annars plagi at úttala meg um, tí vanliga haldi eg munn um málsøkini hjá øðrum landsstýrisfólkum.
Ynskja privatisering
Karsten Hansen dylir tó ikki, at tað framvegis er ynskið hjá Miðflokkinum at einskilja Kringvarpið.
- Útveiting av sendingum er eitt stig á rættari leið, tí eg dugi ikki at síggja skilagóðar grundgevingar fyri, at stovnurin skal hava einkarrætt at gera public service-tilfar. Um greiðar reglur og treytir verða settar, eigur hetta at kunna gerast eins væl av øllum teimum mongu dugnaligu miðlafólkunum, ið eru at finna aðra staðir enn í Kringvarpi Føroya.
- Tað er tað, sum hetta snýr seg um. At Miðflokkurin helst vil taka størri stig og einskilja stovnin er so ein onnur søk, sum ikki er á dagsskrá í samgonguni nú. Tá eru vit inni í tí meira grundleggjandi miðlapolitikkinum hjá flokkinum, sum formaðurin er tann rætti at úttala seg um, sigur landsstýrismaðurin.
