Sjáldsom
vitjan
Eftir innbjóðing frá japanska forsætisráðharranum, Yasuo Fukuda, hevur kinesiski forsetin, Hu Jintao, gjørt av at fara til Japan at vitja næsta ár. Seinast ein kinesiskur forseti var í Japan, var í 1998, tá Jiang Zemin var í Tokyo, men vitjanin endaði í ruðuleika, tí londini fóru at keglast um fortíðina. Síðani eru fleiri innbjóðingar farnar úr Tokyo til Beijing, men ikki fyrr enn nú er nakað komið burturúr. Politiskir eygleiðarar siga, at tey bæði búskaparligu stórveldini hava nógv at tosa um. Eitt nú eru tey ósamd um rættindini til gassið undir havbotninum í Eysturkinesiska Havinum.
Howard
revsar
felagar
Forsætisráðharrin í Avstralia, John Howard, viðgekk í gjár, at tveir týðandi limir í flokki hansara, Liberala flokkinum, høvdu medvirkað til at bera almenninginum ein bókling, sum knýtir Arbeiðaraflokkin at islamskum yvirgangsmonnum. Í bóklinginum, sum Islamska Fylkingin í Avstralia hevur skrivað, takka útgevararnir Arbeiðaraflokkinum fyri at hava stuðlað indonesisku monnunum, sum blivu dømdir fyri bumbuatsóknina á Bali í 2002. Atsóknin var óvanliga ógvuslig og kostaði 202 mannalív. Á tíðindafundi í gjár segði John Howard, at teir báðir floksfelagarnir hava fingið sekkin. Val verður í Avstralia um vikuskiftið.
Óvanlig
blaðgrein
í Iran
Tað hevur vakt stóran ans í Iran og aðrastaðni, at eitt iranskt blað hevur funnist hvassliga at Mahmoud Ahmadinejad, forseta. Millum annað heldur blaðið, at framferðin hjá forsetanum er óheppin fyri iranska samfelagið og tænir ikki landsins áhugamálum í altjóða høpi. Blaðið skrivar eisini, at atburðurin hjá forsetanum elvir til spjaðing innanlands. Útlendskir eygleiðarar halda tað vera sera áhugavert, at greinin stendur í einum blaði, sum verður hildið at hava tætt tilknýti til tann týðandi átrúnaðarleiðaran Ali Khaminei.
