Amerikanski forsetin, Donald Trump, svarar í morgun uppá, at Kanada ætlar at viðurkenna ein palestinskan stat.
Hetta ger forsetin á Truth Social.
- Wow! Kanada hevur júst boðað frá, at tað stuðlar einum palestinskum stati. Tað fer at gera tað sera trupult at gera handilssáttmála við tey. Á, Kanada! skrivar hann.
Freistin hjá amerikanskum handilspartnarum at gera tollavtalu gongur út fríggjadagin 1. august.
Dulnevndar keldur hava sagt við miðilin Politico, at Trump hósdagin fer at skriva undir kunngerðir, sum fara at leggja toll á fleiri lond.
Millum londini er Kanada, varð sagt.
Mikudagin segði kanadiski forsætisráðharrin, Mark Carney, á einum tíðindafundi, at Kanada fer at viðurkenna ein palestinskan stat á aðalfundinum hjá ST í september.
- Tað ætla vit at gera, tí palestinski myndugleikin, PA, hevur bundið seg til at fremja hart tiltrongdar nýskipanir, segði Carney, sambært CNN.
Hann segði eisini, at tað verður neyðugt at viðurkenna eitt palestinskt ríki, um vónin um eina tvíríkisloysn skal varðveitast.
Fleiri av heimsins sjey størstu ídnaðarlondum í G7 hava seinastu dagarnar boðað frá, at tey antin umhugsa ella ætla at viðurkenna ein palestinskan stat.
Frakland er eitt teirra. Franski forsetin, Emmanuel Macron, boðaði í síðstu viku frá, at landið ætlar formliga at kunngera viðurkenningina av ríkinum Palestina á aðalfundinum hjá ST í New York í september.
Bretski forsætisráðharrin, Keir Starmer, segði fyrr í vikuni, at landið fer at gera tað sama, um Ísrael ikki lýkur eina røð av treytum.
Hetta fevnir millum annað um at fáa enda á verandi støðu í Gaza og at semjast um vápnahvíld.
USA hevur gjørt handilssáttmálar við millum annað Bretland, Teiland, Kambodja, Japan, Vjetnam, Indonesia, Filipsoyggjar og Suðurkorea.
USA gjørdi í síðstu viku eina handilsavtalu við ES, sum endaði við, at USA legði ein grundtoll á 15 prosent á vørur, sum vóru innfluttar úr ES.
Samstundis samráðast ovastu embætisfólkini í amerikansku stjórnini eisini um eina avtalu við Kina.
/Ritzau/
