Klokkan 17 verður dystur í bólki F í EM-endaspælinum í fótbólti, sum nógvir føroyingar fara at hyggja eftir.
Tá fara íslendski frændir okkara at spæla ímóti Ungarn, sum fekk eina góða byrjan uppá kappingina við at vinna 2-0 á einum sterkum eysturríkskum liði. Íslendingar fingu í sínum lagi góðan 1-1 javnleik ímóti Portugal.
Tó er vandi fyri, at tveir hollir stuðlar á íslendska liðnum kunnu fáa leikbann til seinasta bólkadystin, sum verður ímóti Eysturríki mikukvøldið klokkan 20. Birkir Bjarnason og Alfreð Finnbogason fingu báðir gult kort í dystinum ímóti Portugal farna týskvøld, og fáa teir báðir aftur gult kort í dystinum ímóti Ungarn í dag, so fáa teir leikbann til dystin ímóti Eysturríki.
Ísland og Ungarn spæla á kenda Stade Vélodrome leikvøllinum í stóra havnarbýnum, Marseille. Stuttligast er at síggja og hoyra dystin á íslendska RÚV, men fólk hava eisini møguleika at síggja dystin beinleiðis á KFV, sum samsendir við danska TV2. NRK 1 vísir eisini dystin.
