Í Russlandi siga tey, at Ukraina visti um, at hernaðarflogfarið, sum eftir øllum at døma varð skotið niður í Belgorod-regiónini í gjár, hevði ukrainskar krígsfangar umborð.
Sambært Reuters vilja tey í Russlandi vera við, at ukrainska fregnartænastan fekk at vita um flutningin av ukrainsku krígsfangunum við russiska hernaðarflogfarinum.
Í Russlandi vilja myndugleikarnir nevniliga vera við, at tað vóru ukrainar, sum skutu flogfarið niður. Øll, sum vóru í flogfarinum, lótu lív - harímillum fleiri ukrainskir krígsfangar.
Sambært Reuters hevur Ukraina hvørki váttað ella avsanna, at ukrainskir krígsfangar vóru í flogfarinum, men landið hevur sagt, at hendingin verður kannað.
Russar vilja vera við, at ukrainska fregnartænastan fekk at vita um flutningin 15 minuttir, áðrenn flogfarið kom inni í økið við Belgorod, har tað eftir øllum at døma varð skotið niður.
