Besta kvinnuliðið hjá StÍF hevur havt ómetaliga lítið at fegnast um seinastu mánaðirnar. Sigurin á Kyndli um vikuskiftið var tann fyrsti í hesum kappingarárinum. Eitt stig var í skjáttuni undan dystinum. Tað var óvæntaði javnleikurin á útivølli móti Tjaldri. Tá varð Bogdan Burcea sagdur úr starvinum sum venjari hjá Tjaldri. Tá var dagurin 10. november 2010.
Fimm mánaðir seinni, tann 13. mars 2011, fekk StÍF umsíðir aftur stig.
Stríddust væl
Kyndil kom illa frá byrjan og legði fyri við fleiri mistøkum. Tað gav StÍF ein fyrimun beinanveg, og tað tóktist sum, at gestirnir høvdu ikki yvirskot til at vinna seg aftur.
Kyndil var ikki til reiðar, er einfalda niðurstøðan.
Tað hevur sjálvsagt sína ávirkan á seinastu landskappingardystirnar, at tað er einki at spæla fyri. Satt at siga, hava øll liðini, uttan Stjørnan, Tjaldur og Neistin, havt lítið at spælt fyri seinastu mánaðirnar. Eingin flytir, eftir øllum at døma, niður í næstbestu deildina.
Hinvegin skal einki takast frá StÍF, sum stríddist væl, og hóast støðuga mótburðin varðveitir góðan hýrin og roynir at geva hinum liðunum mótstøðu.
