Um vikuskiftið verður Norðurlandahúsið endavent. Húsið fer at surra av virksemi, áræði og ikki minst skapanarhuga. Hetta vikuskiftið er tað, at ársins »Ung í Føroyum-stevna« fer av bakkastokki.
Ung í Føroyum er ein heilt serlig mentanarhending, har ung í aldrinum 13 til 18 ár sleppa at geva sítt boð uppá, hvat ungdómsmentan er. Í ár eru seks verksmiðjur við tónleiki, dansi, sirkusi, myndlist, design og skriving. Verksmiðjuleiðararnir skulu vera vegleiðarar meira enn leiðarar, teir hava ikki fasta skrá lagda fyri verksmiðjuna, men skulu í samstarvi við tey ungu seta leggja vikuskiftið til rættis, so øll fáa sum mest burturúr á tí støði, tey eru komin til.
Og tað eru veruliga dugnalig listafólk, sum verða vegleiðarar: Á tónleikaverksmiðjuni verða Lena og Niclas, sum øll ung kenna og nógv elska, Vígdis Hentze kemur heim úr New York at vegleiða dansararnar, yrkarin og rokktónleikarin Petur Pólson stendur á odda fyri skriviverksmiðjuni, sniðgevin Katrina í Geil hevur designverksmiðju, listamaðurin Janus á Húsagarði skal læra frá sær á myndlistaverksmiðuni og franski klovnurin og línudansarin Joel Colas kemur beint úr Fraklandi at hava sirkusverksmiðjuna undir hond.
Meðan arbeitt verður, eru verksmiðjurnar stongdar fyri vitjandi, bert ein hevur óavmarkaða atgongd, og tað er orkesturleiðarin Bernharður Wilkinson, sum skal orkestrera stóru almennu sýningina, sum verður sunnudagin 28. februar klokkan 18 við brotum av øllum tí, sum er hent á stevnuni.
