Í kvøld var føroyingauppgerð, ið samstundis var 1. hálvfinalan í endaspælinum í bestu íslendsku hondbóltsdeildini.
Í høllini á Hlíðarenda í Reykjavík tóku Allan Norðberg, Bjarni í Selvindi og liðfelagarnir í Vali móti Halli Arasyni, Sveini Olafssyni og liðfeløgunum í Afturelding.
Aftaná longda leiktíð eydnaðist tað Vali at vinna 35-33. Tá vanligi leiktíðin var lokin stóð á jøvnum 29-29. Afturelding var á odda 13-12 í steðginum.
Bjarni var toppskjútti hjá Vali við níggju málum, og Allan skoraði trý mál. Hallur skoraði fýra mál fyri Afturelding.
Liðini hittast aftur í Mosfelsbær komandi týskvøld klokkan 20.30. Spælt verður best av fimm dystum.
