Í kvøld spældu Vilhelm Poulsen og liðfelagarnir í Lemvig-Thyborøn grannauppgerð móti Skjern á útivølli í bestu donsku hondbóltsdeildini.
Aftaná dystin eru tað leikararnir og viðhaldsfólkini hjá Skjern, ið eiga argingarrættin. Skjern vann greiðan 35-27 sigur. Í steðginum var Skjern á odda 19-13.
Hóast tapið stóð Vilhelm seg aftur væl í kvøld. Vilhelm gjørdist næstbesti málskjúttin hjá Lemvig-Thyborøn við fimm málum. Harumframt legði Vilhelm upp til tvey mál. Toppskjútti hjá Lemvig-Thyborøn var Jeppe Gade við átta málum.
Lemvig-Thyborøn er nummar níggju í deildini við fimm stigum. Vilhelm og liðfelagarnir eru eitt stig frá áttanda plássinum, ið gevur pláss í endaspælinum tá grundspælið er liðugt.
Komandi mikukvøld verður aftur grannauppgerð. Tá tekur Lemvig-Thyborøn móti Mors á heimavølli.
