Ingolf S. Olsen
Allan Skaalum, sølu- og marknaðarleiðari hjá Atlantic Airways og formaður í Ferðavinnufelagnum, sum er felagið hjá teimum føroysku ferðavinnufyritøkunum, er ikki í iva um, at Visit Faroe Islands fer at verða meira effektivt í oddinum fyri føroyska ferðavinnu, um stovnurin verður loystur úr stramma politiska haftinum og umskipaður til eitt partafelag.
- Í Ferðavinnufelagnum taka vit undir við hesum. Upprunaliga varð arbeitt við, at Visit Faroe Islands skuldi verða helvt um helvt alment og privat, og á eykaaðalfundi í fjør fekk nevndin í Ferðavinnufelagnum heimild til at skjóta pening í eitt slíkt felag. At tað nú verður 100 prosent alment í staðin broytir onki upp ætlanina sum so, men bert upp á eigarastrukturin, so vit taka eisini fult undir við hesum leistinum, sigur hann.
Smidleiki
Allan Skaalum vísir á, at ferðaráð alla aðra staðir fyri langari tíð síðani eru umskipað í heil- ella hálvalmenn feløg við tí fyri eyga at tilføra virkseminum meira dynamikk og fleksibilitet.
- Tað hevur stóran týdning, at ein stovnur sum Visit Faroe Islands kann arbeiða skjótt og smidligt og ikki skal brúka óneyðuga tíð upp á tær nógvu mannagongdir og prosedyrur, ið hanga upp í, tá talan er um ein almennan stovn. Øll orkan, bæði í pengum og arbeiðsorku eigur at fara til marknaðarføring í staðin, sigur hann.
Formaðurin í Ferðavinnufelagnum heldur eisini, at tað er gott samsvar millum ætlanina hjá vinnumálaráðharranum og viljan hjá Løgtinginum.
- Tey seinastu tvey árini er politiska skipanin farin at lata nógv meira pening til Visit Faroe Islands, so stovnurin verður betri førur fyri at marknaðarføra landið og seta ferð á eina vinnu við einum stórum potensjali, og sum eisini fer at kasta nógvar pengar av sær, um rætt verður atborið. Tá hongur tað væl saman, um politiski myndugleikin samstundis tekur burtur allar tær forðingar, ið eru fyri at virka smidligt og effektivit, sigur Allan Skaalum.
