ES "vil standa saman" og er til reiðar at svara amerikanskum tolli á ES-vørum.
Tað segði forkvinnan í ES-nevndini, Ursula von der Leyen, á einum tíðindafundi, sum varð vístur á sosiala miðlinum X tíðliga í morgun.
- Vit eru til reiðar at svara aftur. Vit eru longu í ferð við at gera fyrstu móttiltøkini móti tollinum á stál og aluminium liðug. Vit fyrireika nú fleiri svar fyri at verja okkara áhugamál, sigur nevndarforkvinnan.
Amerikanski forsetin, Donald Trump, kunngjørdi í gjárkvøldið ein toll uppá 20 prosent á innflutningi av ES-vørum.
Von der Leyen sigur, at nýggi tollurin frá USA er "eitt stórt slag fyri heimsbúskapin".
- Avleiðingarnar verða ógvusligar fyri milliónir av menniskjum kring heimin. Allar fyritøkur fara at líða.
- Eg veit, at nógv av tykkum kenna tykkum svikin av okkara elsta sameinda. Vit mugu fyrireika okkum til tær avleiðingar, sum tað heilt víst fer at hava, helt von der Leyen fram og segði, at "tað tykist eingin skipan vera í kaosinum".
Hon leggur eisini dent á, at ES fer at "standa á síðuni hjá teimum, sum eru beinleiðis rakt".
- Evropa stendur saman - fyri vinnulívinum, fyri borgarum og fyri øllum evropearum. Vit fara framhaldandi at byggja brýr til øll tey, sum eins og vit eru sinnað at hava rættvísan og reglugrundaðan handil sum grundarlag undir vælferðini.
Von der Leyen er samd við Trump um, at onkur "órættvíst útnyttar galdandi reglur".
- Eg eri til reiðar at stuðla einum og hvørjum átaki fyri at gera alheims handilsskipanina hóskandi til veruleikarnar í alheims búskapinum. Men eg vil eisini gera greitt, at tað at nýta toll sum fyrsta og seinasta amboð ikki loysir trupulleikan.
- Tí hava vit altíð frá byrjan verið til reiðar at samráðast við USA um at taka burtur forðingar fyri transatlantiskum handli, sigur kommissiónsforkvinnan.
Forsetin í ES, Antonio Costa, skrivaði í einum uppslagi á X í morgun, at hann tekur fult undir við samráðingunum hjá ES-nevndini við USA.
Hann leggur afturat, at ES framhaldandi fer at styrkja og útbyggja sítt handilsnet.
- Tað er tíð uppá at staðfesta avtalurnar við Mercosur og Meksiko og gera avgerandi framstig í samráðingunum við India og aðrar lyklapartar, skrivar hann.
ES-samráðingarliðið og tey fýra suðuramerikansku Mercosur-londini gjørdu í desember eina handilsavtalu eftir samráðingar í nógv ár.
Áðrenn handilsavtalan endaliga kann koma í gildi, skal hon samtykkjast av ES-limalondunum og í ES-tinginum.
Tollurin á ES-vørum kemur í gildi 9. apríl, sigur Trump. Ein grundtollur á tíggju prosent á øll onnur lond - undantikið Russland - kemur í gildi 5. apríl Russland er undantikið, tí USA ”handlar ikki við USA”, sigur amerikanski fíggjarmálaráðharrin, Scott Bessent, við Fox News.
/ritzau/
