Leikluturin hjá landsliðsvenjaranum hjá kvinnulandsliðum, Signe Pries Andersen, er broyttur. Hon er flutt av landinum og kemur nú bara at taka sær av kvinnulandsliðnum restina av 2024.

Upprunaliga skuldi Signe Pries Andersen verða landsliðsvenjari og hava dagligt arbeiði á Fótbóltsdeildini hjá FSF, har hon skuldi at samstarva við feløgini um menning av gentu- og kvinnusíðuni sum heild.

Hetta innibar, at hon saman við familjuni flutti til Føroyar. Tey hava nú ynskt at sleppa aftur til Danmarkar av persónligum áðum. Hon hevur tó í sinni at halda fram sum landsliðsvenjari og tað hevur Fótbóltssambandið fyribils gingið henni á møti við.

- Eg kann vátta, at Signe og familjan eru flutt av landinum aftur, og at leikluturin hjá henni er broyttur. Vit halda tað er skilabest, at hon heldur fram sum landsliðsvenjari restina av árinum, meðan vit í Fótbóltssambandinum finna útav hvussu vit best loysa hesa støðuna, sigur Pætur S. Clementsen, ið ikki avvísur at Signe Pries Andersen kann halda fram sum venjari.

- Tann avgerðin er ikki tikin, so tað er ein møguleiki. Vit hava avtalað at tosa aftur eina ferð í heyst. Fyrst skulu vit umrøða, um vit skulu halda fast við at ein landsliðsvenjari skal búgva í Føroyum, ella um tað finnast aðrar góðar loysnir, sigur Pætur S. Clementsen.

Kvinnulandsliðið skal spæla móti Montenegro í Nations League í dag klokkan 16.45.