Tá løgreglan týsdagin 6.oktober gjørdi ferðslukanningar við Café Natúr í Havn, skrivaðu teir fyri í minsta lagi 24.500 krónur í bótum.
Omanfyri triðingurin av kannaðu sótu ikki í trygdarbelti.
Seinastu tíðina hevur løgreglan javnan verið úti á vegunum og gjørt ferðslukanningar, tær sokallaðu §13 kanningarnar.
Tá Løgreglan fyrradagin gjørdi kanningar uttanfyri Café Natúr á Áarvegnum og út móti Kongabrúgv, var tað ikki smávegis fongur.
Tilsamans kannaðu teir 115 bilar í tveir tímar, og útfrá hesum vóru 49 frágreiðingar skrivaðar.
Heili 41 av teimum 49, ella omanfyri triðingurin av øllum, vóru fyri ikki at sita í trygdarbelti.
Átta frágreiðingar vóru um manglandi koyrikort.
Tvey børn sótu ikki í rættari trygdarútgerð, meðan eitt barn sat leyst í einum vøruvogni.
Tvær ferðir vóru lyktirnar ikki í lagi, og tríggir bilførarar tosaðu eisini í fartelefon, meðan teir koyrdu.
Tilsamans er hetta 57 lógarbrot, og sostatt hevur onkur forbrotið seg meira enn einu ferðina.
Tá minsta bótin nú er 500 krónur, vil tað siga, at í minsta lagi eru bøtur givnar fyri 24.500 krónur upp á hesar báðar tímarnar.
