Í gjár klokkan 18.34 fekk løgreglan eina fráboðan um, at ein stórur klettur var losnaður úr lendinum oman fyri Kaldbaksvegin og var komin oman á landsvegin.
Vaktleiðarin á løgreglustøðini visti í morgun at siga, at hetta var á leiðini einar 400-500 metrar sunnan fyri Sundsá, og gróttilfarið lá serliga á innaru vegbreytini.
- Vit fóru á staðið, og tað tók umleið ein hálvan tíma, til ferðslan á leiðini aftur kundi koyra ótarnað. Ein lastbilur kom á staðið, har førarin hjálpti til at fáa klettin av vegbreytini.
Løgreglan sigur, at tá kletturin, sum helst hevur vigað eini 3-4 tons, var komin oman á landsvegin, var hann brotnaður í nøkur stykkir.
- Eingin skaði stóðst av lopinum, visti vaktleiðarin at siga í morgun.
