36.883 fólk kunnu velja á 58 valstøðum

Tey 36.883 fólkini, sum hava valrætt á kommunuvalinum í dag, kunnu velja á 58 valstøðum kring landið.

Størsta valstaðið er í Høllini á Hálsi í Havn. Har kunnu 12.564 fólk velja. Næststørsta valstaðið er í Klaksvík, har 3.648 fólk hava valrætt.

Minsta valstaðið er eystasta valstaðið í landinum, í Hattarvík, har 12 fólk hava valrætt. Næstminst eru Mykines og Hellurnar, har 13 fólk kunnu velja. Hattarvík er í Fugloyar kommunu, sum eisini umfatar bygdina Kirkju, har 24 fólk hava valrætt. Tilsamans hava 36 fólk atkvøðurætt í Fugloyar kommunu.

Svínoy er partur av Klaksvíkar kommunu, og Mykines er partur av Sørvágs kommunu.

Í størstu kommunu í landinum, Tórshavnar kommunu, hava 15.340 fólk valrætt. Tað er 41,6 prosent av øllum í Føroyum, sum hava valrætt í dag.

Valhølini lata upp klokkan 10 og eru opin til klokkan 20, ella so leingi veljarar møta uttan steðg. Í kommunuvallógini stendur eisini, at eingin má av arbeiðsgevara vera so mikið bundin, at hann fær ikki høvi til at velja.

So skjótt sum atkvøðugreiðslan er av, fer atkvøðuteljingin fram – og hon er almenn. Í kommunum, sum býttar eru upp í tvey ella fleiri atkvøðuøki, fer teljingin fram í hvørjum øki sær.

Niðanfyri sæst yvirlit yvir tey 58 valstøðini í Føroyum.