Tað er Grønlandsbankin, sum kemur við tilboðnum. Bankin hevur lænt 25 milliónir krónur frá Norðurlendska Íløgubankanum (NIB), og tá bankin sjálvur leggur aðrar 25 milliónir krónur omaná, hevur hann 50 milliónir krónur til endamálið.
Peter Petersen, sum er stjóri í privatkundadeildini hjá Grønlandsbankanum, sigur við grønlendska kringvarpið, at fólk kunnu læna upp til 200.000 krónur til orkusparandi umvæling ella umbygging av húsunum ella íbúðini. Tað er tó greitt, at øll hava ikki brúk fyri at læna 200.000 krónur, og tí væntar bankin, at tær 50 milliónir krónurnar fara at røkka til millum 300 og 400 hús og íbúðir.
Tað serliga umhvørvislánið hjá Grønlandsbankanum kann brúkast til eitt nú betri bjálving, nýtt oljufýr, fjarhitaskipan, vatnpumpur og sólarhita.
