Í vikuni boðaði Akstovan frá, at tey høvdu sent sløk 800 mál um nummarplátumiss til løgregluna, og løgreglan hevur eftir øllum at døma ikki sitið á boðunum.
Tí longu í nátt vóru tey úti við saksinum, sum er seinasti rykkjari í slíkum føri.
- Í nátt hava vit tikið 87 nummarplátur í Havn. Talan er um mál um eitt nú vektgjald, trygging ella bilsýn, segði vaktleiðarin á løgreglustøðini í morgun.
Tá løgreglan sigur, at nummarpláturnar eru tiknar í Havn, er hugsandi, at talan er um miðstaðarøkið.
- Hví talið er so stórt, vita vit ikki. Kanska er tað tí, at oljan er vorðin so dýr, helt vaktleiðarin fyri.
Løgreglan minnir fólk á at fáa viðurskiftini í rættlag, og vaktleiðarin helt fyri, at nú hetta kemur út í miðlarnar, er at vóna, at bileigarar fáa viðurskiftini í rættlag.
