Tað sigur Birgir Nielsen, stjóri í flogfelagnum hjá Bakkafrost, sum skal flúgva laks til útflutning úr Føroyum til USA.
Birgir Nielsen segði herfyri, at teir vóru heilt nær við at keypa eitt flogfar, og at ein fyribilsavtala varð gjørt.
– Ja, tað segði eg og so var. Men vit høvdu møguleika at trekkja okkum, og tað gjørdu vit, tí vit vóru ikki nøgdir, sigur hann.
Slíkar avtalur eru fyri at binda seljara, meðan keypari rindar eitt depositum, sigur Birgir Nielsen, sum teir nú hava fingið aftur.
##med4##
– Vit hava ikki gjørt aðra slíka avtalu, nú fara vit bara víðari til tað næsta flogfarið. Vit eru so kritiskir, tí vit vilja hava tað rætta flogfarið, sum er best hóskandi til okkara endamál, sigur hann.
– Ætlanirnar eru enn tær somu, og vit ætla framvegis at fara undir flúgving í summar, sigur Birgir Nielsen.
##med2##
Flogfarið, sum leitað verður eftir, er eitt Boeing 757 farmaflogfar, sum tekur ímillum 30 og 35 tons av farmi.
Birgir Nielsen sigur, at ætlanirnar eru tær somu, sum tær vóru frá byrjan. Flogfarið skal flúgva við laksi frá Bakkafrost úr Føroyum til New York fimm ferðir um vikuna. Flogfarið kann taka 30-35 tons av laksi, og longu frammanundan útflytir Bakkafrost 150 tons av laksi til New York um vikuna. Hesin laksur verður fluttur við traialurum og skipi úr Føroyum til London, har hann fer við flogfari til New York.
– Og her er nógv at spara hjá Bakkafrost, sum kann fáa laksin nógv skjótari fram til deildina hjá felagnum í New Jersey, sigur Birgir Nielsen, sum sigur, at Bakkafrost áður hevur víst á, at felagið fer at spara eini 45 til 50 prosent í CO2 við at flúgva fiskin beinleiðis úr Føroyum til New York í staðin fyri fyrst at flyta hann til London. Tað fer at hava stóran týdning fyri feskleikan hjá laksinum, sum bara verður ein dag gamal, tá hann er í New York.
##med3##
Bakkafrost er høvuðspartaeigari í nýggja flogfelagnum og eigur meirilutan. Hinir partaeigararnir eru stigtakararnir Hans Meinhard á Høgabóli og Heðin Krett, sum báðir eru flogskiparar og sum flúgva farmaflogfør í Bahrain, Andrew Djurhuus, sum er flogmekanikari og hevur sítt egna virki, og so Birgir Nielsen, Cand Merc, sum millum annað hevur starvast í Betri Banka og verið nevndarformaður í P/F Betri. Í dag er hann stjóri í meklarafelagnum Nira og er býráðslimur í Tórshavnar býráð fyri Fólkaflokkin.
Birgir Nielsen hevur áður sagt við Sosialin, at teir báðir flogskipararnir fara at flúgva fyri felagið, men at tað helst verður brúk fyri eini 10 flogskiparum afturat.