Fugloyar kommuna telist millum tær minstu í Føroyum og í báðum bygdunum í oynni, Kirkju og Hattarvík, eru skrásett at búgva tilsamans 44 fólk.
Í bygdaráðnum sita trý umboð, harav Amalia í Frammistovu, sum býr á Kirkju, er borgarstjóri.
Hetta er triðja skeiðið hjá henni við borðendan, og áðrenn hon gjørdist borgarstjóri, sat hon tvær setur í bygdaráðnum.
Eitt annað umboð er eisini av Kirkju. Tað er Marit Christiansen, sum er lærari í skúlanum á Fossanesi og er verdóttir Amaliu.
Triðja umboðið í kommununi er Símun Gullaksen úr Hattarvík, og hann er eisini skrivari hjá Fugloyar kommunu.
Amalia í Frammistovu sigur, at hon enn ikki hevur tikið støðu til, um hon fer at stilla upp aftur ella ei.
- Eg umhugsi støðuna, og einaferð seinni í heyst taki eg endaligu avgerðina, sigur hon í morgun.
Símun Gullaksen er hinvegin ikki í iva um uppstilling og sigur, at hann longu nú hevur tikið avgerð um at stilla uppaftur.
Á seinasta kommunuvali var ein listi, og her fekk Símun Gullaksen flestar persónligar atkvøður.
- Tað er ikki so avgerandi, hvør er borgarstjóri, og tað verður heldur ikki avgerandi eftir valið hesaferð, sigur hann.
##med2##
Símun Gullaksen vísir á, at samstarvið í Fugloyar kommunu er gott, og tað er ikki trupult at finna út av tingunum saman.
- Hetta er ein lítil kommuna, og eg haldi, at vit í bygdaráðnum eru í einum góðum samstarvi, sigur hann.
Amalia í Frammistovu er samd og heldur, at arbeiðslagið í kommununi er gott, eins og samstarvið í norðurøkinum eisini er gott.
Símun Gullaksen fegnast eisini um samstarv við hinar kommunurnar í Norðoyggjum, eitt nú innan eldraøkið og læknaviðurskifti.
Í Fugloyar kommunu eru skrásett 44 fólk - 29 á Kirkju og 15 í Hattarvík.
