Arsenal hevði ongan kjans

Tað er miðviku umfar í Premier League. Stóri dysturin hetta umfarið var millum Manchester City og Arsenal, sum bæði stríðast um meistaraheitið. Manchester City vann 4-1 og stevnir móti meistaraheitinum.

Arsenal hevði sett stig til í trimum teimum seinastu dystunum undan uppgerðini á Etihad leikvøllinum. Soleiðis bleiv eisini í gjár. Longu aftaná sjey minuttir legði Kevin De Bruyne heimaliðið á odda.

Beint fyri hálvleik stútaði John Stones eitt frísparksinnlegg í málið. Flaggið fór upp fyri rangstøðu og myndirnar tóktust vísa, at enski verjuspælari var rangstaddur, men tá linja úr VAR-rúminum bleiv løgd vísti tað seg, at hann var júst røttu megin.

Hetta punkteraði dystin og Manchester City kom eisini upp á 3-0 tíðliga í seinna hálvleiki, áðrenn Arsenal kom við einum mótsvari í seinastu minuttunum. Millum bestu spælararnar á vøllinum var Erling B. Haaland, men tað sá leingi út til, at hann fór málleysur av vøllinum hesaferð.

Tað bragdaði ikki fyrr enn í yvirtíðini, tá hárbandið reyk og faksið hjá málmaskinuni úr Norra fekk frítt at flúgva. Tá eydnaðist honum at umseta ein kjans til mál. Eitt sigandi punktum fyri ein dyst, sum leggur upp til at Manchester City vinnu meistaraheitið, hóast teir enn eru nummar tvey.