Nú eru bara bronsumerkini eftir at stríðast um hjá hoyvíkingum og vestmenningum. H71 tapti fyri kollfirðingum, og tað hevur við sær, at VÍF liggur best fyri í stríðnum um bronsuheiðursmerki.
Fyrimunin vunnið teir sær í ítróttarhøllini í Vestmanna í gjár. Tað hevur verið lítið veiggj í Kyndli seinastu vikurnar, og kyndils-
menn hóttu heldur ikki VÍF í gjár. Úrslitið var 31-26. Holgar
Djurhuus var toppskjútti við átta málum.
Hans Áki útvístur
Tað var miðskeiðis í fyrra hálvleiki, at VÍF fór frá gestunum. Holgar Djurhuus gekk fremst í álopsspælinum, tá heimaliðið vann sær eina leiðslu á fýra mál. Vestmenningar syrgdu fyri við stinnum verjuspæli, at Kyndil ikki kom nærri eftir steðgin.
Tá sjey minuttir restaðu í av dystinum varð Hans Áki Dal-Christiansen útvístur fyri triðju ferð. Tað hevði ikki stórvegis ávirkan, tí heimaliðið var tá á odda 28-22.
Bronsumerkini upp á spæl
Næsta vikuskiftið spæla H71 og VÍF sín seinasta dyst í hesum kappingarárinum. Liðini bresta saman í Hoyvíkarhøllini. Vestmenningar hava 25 stig, sum er eitt meira enn hoyvíkingar. Treytirnar eru tískil einfaldar, um H71 ætlar sær bronsumerkini. Kravið er ein sigur.
