Tað korthúsið rapaði, og Bárður Nielsen hevur vunnið seg inn aftur um tinggátt. Kaj Leo ætlaði – tá Bárður fór – at seta seg sjálvan í fíggjarmálaráðið, men tað slapp hann ikki fyri Heðini Mortensen, javnaðarmanninum, sum var varamaður hjá Kaj Leo á tingi.
Kaj Leo og Bárður draga ikki somu línu. Meðan Kaj Leo droymir sum ríkjafelagsskap og fullveldi og samstarv millum sjálvstøðug lond, so kallar Bárður Nielsen hetta fyri luftkastellir. Hann vil heldur tryggja vælferðina fyri øll í Føroyum heldur enn politiskt klandur um nýggjar grundlógir og loysing.
Okkurt bendir á eina uppgerð. Og uppgerðir eru tey von við í Sambandsflokkinum. Líka síðani tey koyrdu Edmund frá, hevur stríð verið um formanssessin. Listbeth Petersen legði frá sær eftir eyðmýkjandi valósigur. Kaj Leo er útfordraður einaferð av Johan Dahl. Kaj Leo vann og Johan rýmdi fornermaður – men kom tó aftur.
Um Kaj Leo ikki heldur seg í góða gamla sambandsskinninum fram móti næsta landsfundi floksins, so gita vit, at Bárður Nielsen bjóðar honum av, og so hevur Sambandsflokkurin aftur ein trúgvan konservativan sambandsmann sum floksformann.
