Í 23. umfari í næstbestu deildini var B36 í kvøld í Klaksvík, har talan var um undirhaldandi og spennandi uppgerð. Har sá tað heilt ljóst út hjá gestunum, tí longu tá ið eitt stórt korter var farið, var støðan 2-0 til B36. Í báðum førum var tað Emil Weihe Joensen, sum var málskjútti, og í báðum førunum var tað við beinleiðis fríspørkum, at hann sendi bóltin í meskarnar aftanfyri Hannis Matras í heimamálinum.
Hálvleiksstøðan var 2-0 til B36, men longu tveir minuttir eftir steðgin minkaði KÍ um munin. Málskjútti eftir horna var Kristian Svabo Eliasen, og uppleggið átti Jóhan Josephsen, sum fyrr á degnum var aftur í Klaksvík, eftir at hann í gjárkvøldið var nakrar minuttir á vøllinum í Europa Conference League dystinum í Bratislava.
20 minuttir undan leikloki var tað aftur Kristian Svabo Eliasen, sum eftir horna og við høvdinum setti bóltin í málið, og so var 2-2. Krisitan Svabo Eliasen hevur nú skorað fimm mál í 1. deild í ár. Uppleggið átti Silas Gaard, og tað var hann, sum 13 minuttir undan leikloki skoraði 3-2 sigursmálið hjá KÍ. Hetta var fjórða málið hjá 19 ára gamla álopsspælaranum í ár. Í hesum førinum setti Silas bóltin í opið mál, eftir at hann vann bóltin av málverjanum, sum royndi at sneiða framvið Silasi.
Um eina viku fær KÍ vitjan av B68, og annan leygardag fer B36 at spæla á heimavølli ímóti NSÍ.
KÍ er á fjórða plássi við 35 stigum, og B36 er á sætta plássi við 30 stigum.
