Fyri fjórðu ferð á rað fór B71 í dag av vøllinum við úrtøku.
Sandoyingar vunnu seinnapartin 4-2 á heimavølli ímóti FC Suðuroy. Sigurin ber við sær, at B71 hevur 22 stig og er á triðja plássi. B71 hevur spælt 12 dystir, meðan NSÍ, sum er á fjórða plássi, hevur spælt 12 dystir og hevur 20 stig.
Um tað eydnast B71 at halda tørn um triðja plássi, so fer tað at bera við sær, at sandoyingar í 2022 aftur vera í bestu deildini. Men enn er kappingin ikki hálvrunnin.
Tað plagar at vera Clayton Soares, sum skorar nógv av málunum hjá B71.
Soleiðis var tað ikki í dag. Clayton var á vøllinum allar 90 minuttirnar, men hann var ikki millum málskjúttarnar.
Støðan í hálvleikinum var 1-0. Málskjútti eftir 20 minuttir var Klayver Schimith Do Nascimenko.
Sjey minuttir eftir steðgin økti Joel Vazques um munin til 2-0, og ein minutt seinni skoraði Jonas Warner, og so var tað 3-0. Aron Clementsen økti um munin til 4-0, tá ið tað restaði eitt stórt korter, og so sá tað út til, at talan fór at verða um stóra heimasigur.
Men FC Suðuroy svaraði tvær ferðir aftur, og so var úrslitið 4-2. Salmundur Bech minkaði um munin til 4-1, tá ið tað restaðu 13 minuttir, og hann minkaði um munin til 4-2, tá ið tað restaðu níggju minuttir.
FC Suðuroy er aftast við átta stigum.
Um eina viku skal FC Suðuroy spæla á útivølli ímóti B36, og B71 skal til Klaksvíkar.
