Bæði føroyingaliðini í bestu svensku hondbóltsdeildini vóru sigursharrar í kvøld.
Rói Ellefsen á Skipagøtu og liðfelagarnir í Hallby vunnu á útivølli ein greiðan 32-27 sigur á Alingsås. Í steðginum var Hallby frammanfyri við fýra málum, 15-11.
Rói var við fimm málum annar av næstbestu málskjúttunum hjá Hallby.
Hallby er nummar átta í deildini við 24 stigum. Teir eru eitt stig frammanfyri júst Alingsås.
Óli Mittún, Ísak Vedelsbøl og liðfelagarnir í Sävehof vunnu á heimavølli ein tepran 33-32 sigur á Skånela.
Í steðginum stóð einki til hjá Sävehof, tí tá var Skånela á odda 18-15.
Óli gjørdi aftur góðan mun í kvøld. Hann skoraði átta mál og var toppskjútti hjá Sävehof. Óli legði eisini upp til trý mál (assist). Óli var eisini sambært hagtølunum mest effektivi leikarin hjá heimaliðnum.
Sävehof er fjórðfremst í deildini við 28 stigum.
Hallby og Sävehof hava tveir dystir eftir at leika í grundspælinum.
Átta tey fremstu liðini í grundspælinum vinna seg í endaspælið.
