Borgarstjórin í Barcelona, Jaume Collboni, boðaði í gjár frá, at býurin í 2028 fer at taka aftur 10.101 loyvi til íbúðir, sum kunnu stutttíðarleigast. Hesar íbúðir verða serliga brúktar av ferðafólki.
Hetta skal gerast fyri at avmarka leiguprísirnar og húsaprísirnar í Barcelona.
– Nú gera vit nakað við tað, sum vit halda er størsti trupulleikin í Barcelona. Hetta átakið fer at minka munandi um talið á íbúðum, sum ferðafólk brúka í býnum, sigur hann sambært The Guardian. Harvið verða fleiri íbúðir tøkar til tey lokalu at leiga og keypa.
Barcelona telist millum best umtóktu ferðamál í Europa, og eisini nógvir føroyingar vitja býin á hvørjum ári. Atlantsflog hevur í eini 15 ár havt beinleiðis ferðasamband millum Føroyar og Barcelona partar av árinum.
Stóri vøksturin á talinum á feriuíbúðum í Barcelona, sum verða leigaðar út umvegis til dømis Airbnb, hevur viðvirkað til, at Barcelona er mest vitjaði býur í Spania, tá ið tað kemur til útlendingar.
Avleiðingarnar hava verið, at leigukostnaðurin í Barcelona er hækkaður 68 prosent seinastu 10 árini, og húsaprísurin er hækkaður 38 prosent. Tað gongur serliga út yvir ungfólk, sum vilja hava bústað í býnum.
##med2##
Árini millum 2015 og 2023 setti Barcelona forboð fyri at lata upp nýggj gistingarhús í Barcelona, men borgarstjórin Collboni hevur nú sagt, at hetta forboð kann fara at verða linkað í framtíðini.
The Guardian skrivar, at fleiri felagsskapir í Barcelona hava boðað frá tiltaki tann 6. juli, har tey fara at mótmæla ferðavinnuni í býnum undir slagorðinum "Nú er nóg mikið. Latið okkum stegða ferðavinnuni".
