Føroyingar skulu taka skipanina við barnakekkinum upp aftur.
Tað heldur Bill Justinussen, tingmaður fyri Miðflokkin.
Nú Løgtingið viðgerð ólavsøkurøðuna hjá løgmanni, nam tingmaðurin hjá Miðflokkinum við trupulleikan við fólkatalinum.
Hann nevndi í hesum sambandi, at í hesum sambandi hevur onki politiskt tiltak fyri at fáa fólkatalið at veksa, eydnast so væl, sum barnakekkurin, sum var síðst í áttatiárunum, har tað almenna veitti beinleiðis peningaligan stuðul til foreldur, sum fingu børn.
Hann sigur, at tað førdi til eitt ”baby boom” í Føroyum, sum ongantíð áður.
Hann vísir á, at tá vórðu so nógv børn fødd, at tað síðani hevur verið neyðugt at byggja alskyns skúlar og útbúgvingar, út, so vit njóta framvegis gott av teirri bylgjuni.
Nú mælir hann samgonguni til at taka spurningin um barnakekk upp aftur.
Hann sigur, at tað er prógvað at tað gevur úrslit, so tað undrar hann stórliga, at barnakekkurin ikki kemur aftur.
Bjørt Samuelsen, tingkvinna fyri Tjóðveldi, er ikki sannførd um, at tað var barnakekkurin, sum førdi til, at so nógv børn vóru fødd.
- Orsøkin kann eisini vera, at tað vóru góðar tíðir og bógvar kvinnur í burðarførum aldri.
Men Bill Justinussen vísti á, at vit hava eisini havt góðar tíðir síðani, uttan at tað hevur ført til, at fleiri børn vórðu fødd.
Annars vísir uppgerðin hjá hagstovuni, at talið á børnum, sum vórðu fødd tey 10 árini frá 1985 til 1994, hetta:
1985: 739
1986: 787
1987: 779
1988: 864
1989: 928
1990: 943
1991: 861
1992: 805
1993: 759
1994: 666
