Fyrstu dystirnir í 3. umfari í bólkaspælinum í Champions League hava verið. Tað vóru óvæntaði úrslt, tað vóru stórsigrar og VAR-dramatikkur í kvøld.
Bólkur A:
Napoli vann ikki minni enn 6-1 í Amsterdam móti Ajax. Tað var annars heimaliðið, sum kom á odda, men tað stóð ikki við. Napoli hevur fult stigatal og álopsspælið riggar avbera væl. Ajax er enn á trimum stigum og spæla aftur móti Napoli komandi umfar.
Tað var eitt ávíst trýst á Liverpool undan dystinum móti Rangers, men longu aftaná sjey minuttir sendi tann í løtuni so nógv útskeldaði Trent Alexander-Arnold eitt fríspark í málið. Mohamed Salah staðfesti sigurin í seinna hálvleiki við brotssparki.
Ajax – Napoli 1-6
Liverpool – Rangers 2-0
Bólkur B:
Belgiska Club Brugge er púra óvæntað oddalið í bólkinum við níggju stigum fyri tríggjar dystir. Teir fingu í kvøld vitjan av Atletico Madrid, sum á pappírinum er sterkasta liðið í bólkinum, men heimaliðið vann 2-0.
Í hinari uppgerðini vann FC Porto 2-0 á gestunum úr Bayer Leverkusen. Margháttligasta støðan í dystinum var í fyrra hálvleiki, tá FC Porto helt seg skorað, men málið bleiv kolldømt tí tað var hond á bóltinum í hinum brotsteiginum. Bayer Leverkusen brendi brotssparki. Fyri uttan Club Brugge hava øll liðini trý stig í bólkinum.
Club Brugge – Atletico Madrid 2-0
FC Porto – Bayer Leverkusen 2-0
Bólkur C:
Bayern Munchen vann greiðan 5-0 sigur á Viktoria Plzen og hevur kós móti endaspælinum. Í Milano var dramatikkur. Inter Milan skoraði beint fyri hálvleiki, og FC Barcelona fekk eitt mál kolldømt fyri hond.
Løtu seinni fór bólturin í hondina á einum spælara hjá Inter Milan, men hóast VAR hugdi eftir hendingini, so bleiv tað ikki til brotsspark. Eftirfylgjandi eru upptøkur vístar, sum vísa at bólturin fór í hondina. FC Barcelona hevur nú trý stig, meðan Inter fer upp á seks.
Bayern Munchen – Viktoria Plzen 5-0
Inter Milan – FC Barcelona 1-0
Bólkur D:
Mest avgerandi dysturin í hesum bólkinum var millum Marseille og Sporting Lisbon. Suðurfranska stórfelagið, sum enn er einasta franska felagið at vinna kappingina, skuldi vinna á odda liðnum í bólkinum. Tað gjørdu teir við 4-1 eitt sigri og nú er alt møguligt í bólkinum.
Eintracht Frankfurt og Tottenham spældu málleysan javnleik og hava nú fýra stig í part, meðan Sporting við sínum seks stigum er oddalið í bólkinum, samstundis sum hetta vóru fyrstu stigini hjá Marseille.
Marseille – Sporting Lisbon 4-1
Eintracht Frankfurt – Tottenham 0-0
