Bill Justinussen hevur nú meldað seg úr Miðflokkinum, sum hann var við til at stovna. Hann hevur nú teknað seg sum lim í Fólkaflokkinum.
Bill Justinussen byrjaði sína politisku yrkisleið í Kristiliga Fólkaflokkinum Føroya Framburðs- og Fiskivinnuflokki. Har kom ósemja í, og fólk úr flokkinum tóku stig til at stovna Miðflokkin, sum fyrstu ferð varð umboðaður á tingi í 1994, tá Jens av Rana og Tordur Niclasen vórðu valdir á ting fyri flokkin.
Í 1998 og 2002 var Jenis av Rana valdur einsamallur fyri flokkin, men í 2004 varð Bill Justinussen eisini valdur. Hann var eisini afturvaldur í 2008, 2011, 2015 og í 2019, men hann fall á valinum í 2022. Ikki tí at flokkurin misti tingsessin, men tí at hann varð yvirhálaður av Steffani Klein Poulsen, sum hevði havt sæti á tingi sum varamaður fyri Jenis av Rana. Steffan Klein Poulsen fekk 518 atkøvður, meðan Bill Justinussen fekk 382.
Sambært Kringvarpinum hevur Bill Justinussen melda seg upp í Eysturoyar Fólkafloksfelag. Fólkaflokkurin hevur ein nýggjan tingmann í Eysturoy, Bárður á Lakjuni. Hann varð valdur sum nummar tvey á listanum hjá Fólkaflokkinum við 498 atkvøðum – aftaná floksformannin, Beinir Johannesen, sum fekk 1688 atkvøður.
Við Vágaportalin sigur Bill Justinussen, at hann hevur ásannað, at hann er ov borgarligur til Miðflokkin.
