Birgir er ættaður av Oyrarbakka, sonur Annu og Joan Petur Andreasen og er giftur Elsebeth, sum er ættað av Eiði. Birgir og Elsebeth eiga døturnar Joan og Beintu umframt ommu- og abbabørn.
Hóast Birgir hevur fingist við møblar í langt yvir 40 ár, so var hann ein drivin forrætningsmaður, tá hann byrjaði. Hann var valla fyltur 20 ár, tá hann tók yvir ein matvøruhandil í Tórfinsgøtu í Havn, og fyri ta tíð var hann í læru í amboðsdeildini hjá Thomas Dam í N. Finsensgøtu.
Tað var í 1979, at Birgir og Elsebeth leigaðu seg inn í bygningin hjá P/F Jákup á Dul við Staravegin í Havn og byrjaðu eina eftir tátíðarmetum risastóra møblasølu.
Í 1982 bygdu tey stóran bygning við síðuna av, har ið Jysk er í dag. Hesin bygningur var 2.200 fermetrar til víddar.
Í 1988 var so tann rættuliga stóri bygningurin bygdur við Hoyvíksvegin, har sum Posta er í dag. Nógv vóru tey, ið allarhelst hildu, at Birgir spenti bogan í so høgt, men hann trúði upp á ætlanina – sum kundi havt eydnast, um ikki ógvusliga búskaparkreppan skræddi beinini undan virkseminum.
Í 1991 byrjaðu tey aftur í smáum í leigaðum hølum hjá Berg Motors – og frá fyrsta degi gekk væl hjá teimum. Árið eftir lótu tey upp størri handil í bygninginum hjá Havnar Timburhandli, har tey vóru til 2000, tá flutt varð í nýggja, stásiliga bygningin, sum er góðar 4.000 fermetrar til víddar.
Birgir er eisini við í leiðsluni í Zarepta í Vatnsoyrum.
##med2##
##med3##
