Eitt forboð ímóti koran-brenning avmarkar ikki skrivi-og talufrælsið. At brenna bøkur, er ikki nøkur útsøgn ella "ytring".
Tað heldur danski forsætisráðharrin, Mette Frederiksen, og hon leggur aftrat:
- Tí er tað heldur ikki nøkur avmarking av skrivi-og talufrælsinum, um tað verður bannað at brenna religiøsar bøkur.
Hetta sigur hon í samrøðu við Weekendavísina í dag.
Tað var sunnudagin, at danski uttanríkisráðharrin, Lars Løkke Rasmussen, segði, at stjórnin leitar eftir einum rættarligum "amboði", sum kann gera, at koran-brenning fer í søguna.
- Mær dámar ikki, at fólk gera hetta. Bøkur skulu lesast, ikki brennast, sigur forsætisráðharrin.
Í samrøðuni við Weekendávísina vildi Mette Frederiksen ikki siga, um tað hevur ligið eitt ávíst trýst á Danmark í samband við, at fleiri koran-brenningar hava verið í landinum.
Ávísin spurdi eisini danska forsætisráðharran, um ríkisleiðarar ella onnur hava ringt til hennara og hava sett fram ynskið um, at Danmark bannar slíkum við lóg.
Koran-brenningar bæði í Stokkhólmi og Keypmannahavn hava ført til stór mótmælistiltøk í muslimsku londunum.
- Vandin fyri at gerast isoleraður á altjóða pallinum, er eisini ein trupulleiki júst nú, sigur Mette Frederiksen við Weekendávísina.
