Á fundinum luttaka umboð fyri løgregluna og sløkkilið, umframt umboð frá øðrum viðkomandi myndugleikum, sum hava havt við Athenu-málið at gera.
Stórir partar av lokalsamfelagnum á Skálafjørðinum hava verið vitni til hendingina umborð á Athenu. Hendingin er av slíkum slag, sum tíbetur sjáldan kemur fyri her á okkara leiðum. Tílíkar hendingar kunnu tó koma fyri, sæð í ljósinum av øktari skipaferðslu við stórum skipum, í føroyskum havnum og á havinum kring Føroyar.
Hóast myndugleikarnir hava gjørt sítt til, at kunningin hevur verið nøktandi, kunnu tað verða borgarar á Skálafjørðinum sum ynskja, at høvi verður hjá teimum at seta myndugleikunum nakrar ískoytisspurningar í sambandi við hendingina.
Endamálið við borgarafundinum er í fyrsta lagi at tryggja, at borgarin á Skálafjørðinum hevur fingið eina nøktandi kunning um hendingina og møguligar avleiðingar av henni. Í øðrum lagi er málið við borgarafundinum, sæð í einum framtíðar høpi, at tilbúgvingin í Føroyum fær nøkur góð hugskot og amboð frá fundinum at arbeiða víðari við.
