Loksins er avgjørt, hvar 20 ára gamli landsliðsspælarin Brandur Hendriksson Olsen fer at spæla fótbólt næstu árini.
Tað verður í Randers, at miðvallarin skal stríðast fyri at sleppa framat. Sambært heimasíðuni hjá felagnum er talan um trý ára sáttmála. Í morgun hevur hann verið til kravdu læknakanningina.
Brandur spældi undan summarsteðginum í Vendsyssel í næstbestu deildini. Hann hevur verið sáttmálabundin í FCK, men útlitini fyri at sleppa framat á besta liðnum vóru ikki serliga góð. Brandur veit, at tað eisini í Randers er kapping um plássini:
-Eg veit, at eg skal arbeiða nógv fyri at sleppa á liðið. Tað eru nógvir góðir spælarar í felagnum og harvið stór kapping um plássini, men eg gleði meg at fara undir uppgávuna og at staðfesta, at eg havi evnini at gera mun á hægsta støði í donskum fótbólti, sigur Brandur Henriksson Olsen við heimasíðuna hjá Randers FC.
Í Randers siga teir seg vera fegnar um, at Brandur nú er Randers spælari:
-Hann er framrættaður og hevur góðan tekniskan førleika, og hann er førur fyri at spæla í øllum plássunum á framrættaða partinum av liðnum. Hann sparkar ógvuliga væl og er tískil hóttan í sambandi við deyðbóltar. Tí er hann áhugaverdur spælari, sum vit fegnast um at hava fingið fatur á, sigur ítróttarstjórin í Randers FC Ole Nielsen við heimasíðuna hjá felagnum.
Brandur er fjórði føroyski spælarin í superliguni. Hinir eru Jóan Símun Edmundsson í OB, Hallur Hansson í Horsens og Gilli Rólantsson Sørensen í AaB.
