Eiðis kommuna hevur fingið nýggjan og snotuligan fótbóltsvøll í Hólmanum, og kommunan hevur eisini samtykt at byggja eitt kombinerað bygda-og ítróttarhús við fótbóltsvøllin.
- Øll tey formligu viðurskiftini við húsinum eru komin upp á pláss, tekningarnar eru góðkendar, men sjálvur byggisáttmálin er ikki undirskrivaður.
Jógvan í Skorini, borgarstjóri í Eiðis kommunu, væntar, at byggitíðin verður einar 10-14 mánaðir frá tí, at arbeiðið er byrjað, og ætlandi fer arbeiðið í gongd sum skjótast, soleiðis at húsið stendur liðugt næsta summar.
Tað verður Eiðis kommuna, sum kemur at eiga bygda-og ítróttarhúsið, sum umframt at verða karmur um fasilitetir til ítróttarvirksemi við skiftirúmum og brúsum, eisini fer at hava ein veitslu-og samkomusal til 250-300 fólk.
- Haraftrat verða tvær stovur bygdar til frítíðarskúla, eins og venjingarrúm á umleið 100 fermetrar verður til bygdafólkið við ymiskum maskinum.
Borgarstjórin sigur, at ætlanin er at keypa nýggjar maskinur til venjingarhølini, og hesar koma helst at kosta einar 400.000-500.000 krónur.
Hann vísir á, at bygda-og ítróttarhúsið verður umleið 900 fermetrar stórt, og kostnaðurin fer væntandi at liggja um einar 13-14 miljónir krónur.
Í nýggja húsinum verða eisini áskoðarapláss.
- Eg haldi, at fólk eru glað fyri nýggja fótbóltsvøllin, og her er longu komið lív í. Fleiri av barnavenjingunum hjá EB/Streymi eru her, tí børnini venja hvør sær og hava eina felags venjing um mánaðin. Onkur av lægru vaksnamannadeildunum hava eisini leikt dystir á vøllinum.
Hann sigur, at fótbóltsvøllurin hevur verið nógv brúktur, og nógv fólk hava verið og hugt, tá ítróttartiltøk hava verið.
Jógvan í Skorini vísir á, at onkur teirra, sum var ímóti ætlanini at byggja fótbóltsvøllin, sum annars liggur á ógvuliga náttúruvøkrum staði, fýltist á, at kommunan brúkti so nógvan pening upp á hesa verkætlan.
- Tá fólk hoyra, at fótbóltsvøllurin er fíggjaður yvir raksturin, og at hann er liðugt goldin, eru nærum øll samd um, at hetta var ein røtt íløga at gera, sigur borgarstjórin.
