1. oktober var farið undir at skera stál til nýbygningin hjá Smyril Line
7. januar 2002 verður kjølurin strektur og so byrjar byggingin av álvara. Í september mánaði skal skipið sjósetast, og í januar mánaði 2003 verður royndartúr.
Smyril Line fær nýggja skipið í februar mánaði 2003.
Fyrireika seg
Hóast meira enn eitt ár er til nýggja Norrøna kemur, er Smyril Line farið at fyrireikað seg til nýggja skipið.
5. november í ár flytur Smyril Line alt sítt virksemið í Danmark til Hanstholm. Tað vil siga, at ferðamannadeildin Færø Rejser, sum higartil hevur hildið til í Keypmannahavn, letur skrivstovuna aftur har og verður frá 05.11.2001 flutt í høli hjá Smyril Line á Trafikhavnsg. 7 í Hanstholm.
Nýggjur leiðari á ferðamannadeildini í Hanstholm er Solvej Boltz, sum kemur úr einum leiðandi starvi í ferðavinnuni í Thy.
Aage Bruun í Hanstholm er settur sum stjóri fyri øllum virkseminum hjá Smyril Line í Danmark, sum umfatar ferðafólk, farm og flutning.
Lata upp í Hetlandi
Tann 5. november letur Smyril Line upp skrivstovu í Lerwick í Hetlandi til at taka sær av ferðafólki og farmi.
Í tí sambandi eru fyribils sett 2 fólk. Gary Flaws er settur sum umsitingarleiðari. Hann kemur úr líknandi starvi hjá P&O Ferries Shetland. Og Gillian Fry er sett sum marknaðarleiðari, hon kemur úr líknandi starvi hjá Shetland Agricultural Marketing.
Skrivstovan verður í nýggja Terminal Building Holmsgarth Lerwick, men til 1. mars 2002 heldur skrivstovan til í øðrum bygningi á havnarlagnum.
Flyta saman
Smyril Line ? Norræna Ferðaskrifstofan Reykjavík er frá 22. oktober í ár flutt saman við ferðaskrivstovuni Terra Nova. Nýggja navnið er "Norræna-Terra Nova", og er adressan Stangarhyl 3a, 110 Reykjavík.
Tað er beint við høvuðsvegin Vesturlandsvegur í Reykjavík á vegamótinum til vestur-, norður- og eystur-Ísland.
Á skrivstovuni starvast umleið 30 fólk á vetri og 45 á sumri. Anton Antonson er stjóri og eigari av Terra Nova.
Støðan á Seyðisfirði er óbroytt hvat viðvíkur avgreiðslu av ferðafólki og farmi.
