Leygarkvøldið 4 maj verður Deep Purple kvøld í Dansifrøi í Havn
Tað verður tann vælkendi íslendski bólkurin, Dúndurfréttir, sum fer at spæla løg hjá legendariska rockbólkinum, Deep Purple, fyri okkum hetta kvøldið.
Dúndurfrettir hevur verið í Føroyum tríggjar ferðir áður.
Fyrstu ferð var í 2009, tá ið bólkurin framførdi The Wall eftir Pink Floyd saman við Føroya Symfoniorkestri á trimum fullsettum konsertum í Norðurlandshúsinum.
Aðru ferð var í 2011, tá ið bólkurin framførdi The Dark Side of the Moon eftir Pink Floyd, har vóru um 800 áhoyrarum.
Og seinast Dúndurfrettir vóru í Føroyum, var í fjør, tá ið teir høvdu eitt Led zeppelin kvøld í Norðurlandahúsinum.
Nú koma teir so aftur til Føroya, hesuferð við tónleiki eftir Deep purple.
Deep Purple hevur eitt ótal av superhittum og her í Føroyum, eins og um tað mesta av heiminum, hevur bólkurin altíð verið sera væl umtóktur og nógvar LP plátir -og seinni fløgur- av bólkinum eru at finna í plátuhyllunum kring landið.
Aftaná konsertina við Dundurfrettir verður dansur og konsert við føroyska bólkinum Deiggj.
Deiggj hava seinastu árini lagt dentin á at spæla klassiskan rock frá sjetiárunum. Serliga kendir eru teir kendir frá Uriah Heep tiltøkunum teir hava havt, eitt nú saman við John Lawton, sum sang í Uriah Heep eitt skifti.
Deiggj spæla eisini løg hjá Clapton, Gasolin, Rolling Stones, the Doors, Dire Straits og øðrum.
Niðanfyri eru nakrar smakkiroyndir av Dúndurfrettir, tá ið teir geva seg í kast við Deep Purple.
