Vørugoymslan hoyrir til nethandilsfyritøkuna Wildberries, sum verður roknað sum russiska svarið upp á Amazon.
Sambært russiskum myndugleikum vórðu trý fólk særd í álopinum.
Myndir frá staðnum vísa, at tjúkkur roykur legði seg yvir stórar partar av býnum.
Wildberries upplýsir, at arbeiðið á tveimum vørugoymslum í økinum er fyribils steðgað orsakað av álopinum.
Samstundis varð flogferðslan í Sankt Pætursborg fyribils steðgað, men hon varð tikin upp aftur um seks-tíðina lokala tíð.
Hetta er triðja ferðin innan ta seinastu vikuna, at ein vørugoymsla hjá Wildberries verður rakt.
Í síðstu viku segði ukrainski forsetin, Volodymyr Zelenskyj, at eitt av goymsluhúsunum varð brúkt til at goyma sanktiónsbannaðan útbúnað til framleiðslu av dronum og navigatiónsútgerð.
Russiskir myndugleikar søgdu tá, at átta vaktarfólk lótu lív.
Eisini mikumorgunin vórðu tvær aðrar Wildberries-goymslur í útsynnings parti av Russlandi álopnar. Tá vórðu sambært russiskum myndugleikum átta fólk særd.
Ukraina hevur enn ikki alment viðmerkt álopið í Sankt Pætursborg.
