Arnbjørn Hansen fekk ein skaða í baklærið í landsdystinum móti Íslandi. Um vikuskiftið verður staðfest hvussu álvarsligur skaðin er. Í ringasta føri verður hann ikki tøkur til steypafinaluna 24. august.
- Eg merki tað og havi eitt sindur ilt, men eg havi ikki gjørt nakað síðani landsdystin, so eg veit ikki hvussu álvarsligt tað er, sigur Arnbjørn Hansen vónbrotin á málinum.
Væntandi fær hann nærri boð í kvøld, tá EB/Streymur skal venja. Tað er sannlíkt, at hann ikki spælir við sunnudagin móti NSÍ.
- Sum tað sær út nú, so spæli eg ikki sunnudagin, sigur Arnbjørn víðari.
Arnbjørn Hansen hevði ein drúgvan skaða í knænum fyrr í ár. Hann er komin fyri seg eftir tann skaðan og byrjaði inni í dystinum Íslandi. Tað var stutt undan einsamalla málinum hjá íslendingum, at hann Arnbjørn bleiv.
- Tað var tá eg misti bóltin, sum teir so skora uppá. Eg fór í eina takling og merkti so okkurt í baklærinum, sigur Arnbjørn Hansen.
Eftir ein drúgvan skaða í summar, so er Arnbjørn av álvara komin fyri seg. Tí kemur tað illa við, at blíva skaddur aftur.
- Eg eri akkurát komin fyri meg, so tað var einki serligt at blíva skaddur aftur, sigur landsliðsframherjin at enda.
EB/Streymur skal sunnudagin spæla móti NSÍ í landskappingini. 24. august skal EB/Streymur spæla móti Víkingi í steypafinaluni. Arnbjørn og EB/Streymur kapprenna sostatt fyri at framherjin skal verða klárur til finaluna.
